Educational and General Updates కోసం నా వాట్సాప్ నెంబర్ 9390696970 ను మీవాట్సాప్ గ్రూపులో add చేయగలరు www.apedu.in.

Latest information

Teachers Corner

More

Student Corner

More

Sponcerd links

Sponcerd Links

General Information

More

About Nandamuri Taraka Ramarao

 తెలుగుజాతి ఆత్మగౌరవ ప్రతీక ఎన్ఠీఆర్!

About Nandamuri Taraka Ramarao


 తెలుగు చలనచిత్రరంగంలో దాదాపుగా నాలుగు దశాబ్దాలు అనేక పౌరాణిక,జానపద,చారిత్రక,సాంఘిక చిత్రాలలో విభిన్న పాత్రలు పోషించి,  మకుటంలేని మహారాజుగా వెలిగిన విశ్వవిఖ్యాత నట సార్వభౌముడు,నటరత్న, పద్మశ్రీ నందమూరి తారకరామారావు గారు తెలుగునాట వెండితెర వేలుపు గా రాముడు, శ్రీకృష్ణుడు వంటి పౌరాణిక పాత్రలతో అబాలగోపాలం చేత కీర్తించ బడటం ఒక చరిత్ర. అదేవిధంగా ఆయన నటుడుగా ఓకేచిత్రంలో 5 విభిన్న పాత్రలు పోషించడమే కాకుండా,  నిర్మాత,స్క్రీన్ ప్లే, దర్శకత్వం వంటి బాధ్యతలతో అనేక రికార్డులు సృష్టించారు. 


తెలుగు ప్రజలు తనపట్ల చూపిన ఆదరాభిమానాలకు ప్రతిగా తనవంతుగా ఏదైనా చేయాలని సంకల్పించి "సమాజమే దేవాలయం-ప్రజలే నా దేవుళ్ళు"అని భావించి, ఆనాటి ఆంధ్రప్రదేశ్ రాష్ట్ర ప్రజలు ఎన్నుకొన్న అసెంబ్లీలో ఎమ్మెల్యేల మాటకు విలువలేకుండా ఢిల్లీలో అప్పటి కాంగ్రెస్ పార్టీ  అధిష్టానం చేతిలో కీలుబొమ్మలుగా చిటికీ మాటికి ముఖ్యమంత్రులను మర్చివేసే  దుర్భర పరిస్థితులలో "తెలుగు జాతి ఆత్మగౌరవం"నినాదం తో 1982మార్చి29న  'తెలుగుదేశం'పార్టీని స్థాపించి రాజకీయ రంగప్రవేశం చేశారు.

చైతన్యరథం పై రాష్ట్రమంతా సుడిగాలి పర్యటనలతో ప్రజలలో మమేకమయ్యారు. ఎక్కడ సభ జరిగినా "ఆకాశం చిల్లు పడిందా,నేల ఈనిందా"అనేవిధముగా జనము పెద్ద సంఖ్యలో హాజరై, ఆయన ప్రసంగాలను ఎంతో ఆసక్తిగా  తన్మయంతో వినటం నేను ప్రత్యక్షముగా చూశాను.   తమ అభిమాన నటుడుని  తమ కష్టాలను తీర్చడానికి వచ్చిన "అన్న"గా ఆరాధించారు.అప్పట్లో ఇంతగా సమాచార మాధ్యమాలు లేకున్నా తెలుగుదిన పత్రికలు ముఖ్యంగా 'ఈనాడు"పేపర్ ఎన్ఠీఆర్ సభలు,ప్రసంగాలు బాగా కవర్ చేసేవారు. కార్మిక,కర్షక,పెదప్రజల ఇబ్బందులని ఎన్ఠీఆర్  గుర్తించారు.

జనసంక్షేమాన్ని విస్మరించి, అవినీతి,అసమర్ధ పాలకులైన నాటి కాంగ్రెస్ ప్రభత్వానికి వ్యతిరేకంగా ఎన్నికల్లో పోటీచేసి,పార్టీ పెట్టిన కేవలం 9 నెలల స్వల్ప కాలంలోనే సుదీర్ఘ చరిత్ర కలిగిన కాంగ్రెస్ పార్టీపై ఘన విజయం సాధించి ఆంధ్రప్రదేశ్ రాష్ట్రానికి తొలి కాంగ్రసేతర ముఖ్యమంత్రి గా రికార్డు సృష్టించారు.

1983జనవరి 9వతేదీన హైద్రాబాద్ లాల్ బహదూర్ స్టేడియంలో బహిరంగ సభలో ముఖ్యమంత్రిగా ప్రమాణ స్వీకారం చేసిన ఎన్ఠీఆర్ పాలనలోను తనదైన ముద్రతో  రెండు రూపాయలుకే కిలో బియ్యం,పేదలకు శాశ్వత గృహ నిర్మాణాలు వంటి  అనేక సంక్షేమ కార్యక్రమాలు అమలుతో పాటు దేశంలోనే తొలిసారిగా మహిళలకు ఆస్తిహక్కు, పద్మావతి మహిళా విశ్వ విద్యాలయం తెలుగు విశ్వవిద్యాలయం,పాలనలో అవినీతిని అంతం కోసం "ధర్మ మహా మాత్ర" వంటి అనేక వ్యవస్థలు తీసుకు వచ్చారు. గ్రామాల్లో ప్రజలకు పీడించి ఇబ్బంది కరంగా,ఫ్యూడల్ అవశేషాలుగా కొనసాగుతున్న  గ్రామాధికారుల(ఆంధ్రా ప్రాంతంలో మునసబు,కరణం లు,తెలంగాణలో పటేల్ పట్వారీ) వ్యవస్థలు రద్దు వంటి విప్లవాత్మక మార్పులు తెచ్చారు.ఎన్ఠీఆర్ ప్రజాకర్షక విధానాలు చూసి తట్టుకోలేని నాటి కేంద్ర పాలకులు   నాదెండ్ల భాస్కరరావు ద్వారా ఎన్ఠీఆర్ ప్రభుత్వాన్ని అప్రజాస్వమికంగా  "వెన్నుపోటు" పొడిచి 1984 ఆగస్టులో గద్దె దించారు.

"అన్న" గారికి జరిగిన అన్యాయాన్ని యావత్తు తెలుగుజాతి అంతా ఉబ్బెత్తున ఉద్యమించడంతో ప్రజాగ్రహాన్ని గుర్తించిన ఢిల్లీ పెద్దలు నెలరోజులలోనే తిరిగి ఎన్ఠీఆర్ కు పట్టం కట్టారు..

స్వాతంత్రం వచ్చినప్పటినుండి దేశాన్ని తిరుగులేని శక్తిగా ఏలుతున్న కాంగ్రెస్ పార్టీకి ఎన్ఠీఆర్ ఒక సవాలుగా మారి రాష్ర్టాల హక్కుల్ని కాలరాసి,భారత రాజ్యాంగంలో కల్పించిన ఫెడరల్ స్ఫూర్తికి విరుద్దంగా వ్యవహరిస్తున్న నాటి కేంద్ర ప్రభుత్వానికి వ్యతిరేకంగా, కాశ్మీర్ నుండి కన్యాకుమారి వరకు అప్పటి  కాంగ్రెసేతర ముఖ్యమంత్రులను ఏకంచేసి దేశ రాజకీయాల్లో ఒక కొత్త శకానికి నాంది పలికారు.

1984 అక్టోబర్31న ప్రధాన మంత్రి శ్రీమతి ఇందిరాగాంధీ గారి దారుణ హత్య అనంతరం జరిగిన పార్లమెంట్ ఎన్నికల్లో దేశవ్యాప్తముగా వీచిన సానుభూతి పవనాల్లో ప్రతిపక్షాలన్నీ కొట్టుకొని పోగా ఆంధ్రప్రదేశ్ లో మాత్రం ఎన్ఠీఆర్ ఇమేజ్ వల్ల   తెలుగుదేశం పార్టీ 30 మంది ఎమ్.పి.లతో గెలిచి లోక్ సభలో ప్రధాన ప్రతిపక్ష పార్టీగా నిలవడం కూడా ఒక చారిత్రాత్మక ఘట్టమే. అలా అనుకోకుండా దేశరాజకీయాలు ఎన్ఠీఆర్ చరిష్మా వైపు చూసి, కాంగ్రెస్ వ్యతిరేక పార్టీలన్నీ ప్రత్యమ్నాయ వేదికగా ప్రయత్నాలు చేశారు.

రాజీవ్ గాంధీ ప్రభుత్వంపై  బోఫోర్స్ కుంభకోణం ఆరోపణలు ఎదుర్కొంటున్న సమయంలో ప్రతిపక్ష పార్టీలన్నీ కేంద్రప్రభుత్వానికి వ్యతిరేకంగా ఏకం చేయడం లో భాగంగా ఎన్ఠీఆర్ చైర్మన్ గా "నేషనల్ ఫ్రెంట్"స్థాపించారు. 

కాంగ్రెస్ పార్టీని ఓడించాలన్న  లక్ష్యంతో

పరస్పర భిన్న ధ్రువాలైన బి.జె.పి.మరియు వామపక్షాలు ఇరువురిని ఒకేవేదికపై తీసుకువచ్చిన అరుదైన చరిత్ర కూడా అయినకే దక్కింది.

1989లో వివిధ కాంగ్రసేతర పార్టీల కూటమిగా     "నేషనల్ ఫ్రెంట్" ప్రభత్వం అధికారంలోకి రావడం దేశంలో సంకీర్ణ రాజకీయాల  కొత్త అధ్యాయానికి శ్రీకారం చుట్టింది కూడా ఎన్ఠీఆర్!

అయితే దేశరాజకీయాల్లో పూర్తిగా నిమగ్నమైన ఆయన రాష్ట్ర ప్రభుత్వ పాలనలో కొంత అలసత్వం వల్లనో, ప్రభత్వ ఉద్యోగులతో పాటు కొన్ని వర్గాల్లో వ్యతిరేకత , తన సహచర మంత్రులు,ఎమ్మెల్యేలు ప్రజావ్యతిరేక పనులవల్లనో కానీ 1989 లో జరిగిన అసెంబ్లీ ఎన్నికల్లో ఎన్ఠీఆర్ తొలిసారి ఓటమి చవిచూశారు.రాష్ట్రంలో అధికారం కోల్పోయినా కేంద్రంలో ఆయన చైర్మన్ గా ఉన్న "నేషనల్ ఫ్రెంట్" ప్రభుత్వము అధికారంలో ఉండటంతో భాగస్వామ్య పక్షాల మధ్య విభేదాలు పరిస్కరానికి తరచూ ఢిల్లీ వెళ్లేవారు.దేశరాజకీయాలు ఒక మలుపుతిప్పిన గొప్ప తెలుగుతేజం ఎన్ఠీఆర్!ప్రధాని పదవి కోసం      అంతర్గత కలహాలతో నేషనల్ ఫ్రెంట్ ప్రభుత్వం కూలిపోవడంతో

1991లో జరిగిన ఎన్నికల్లో రాజీవ్ గాంధీ హత్య అనంతర పరిణామాల్లో స్వల్ప మెజారిటీతో అధికారంలోకి  వచ్చిన  కాంగ్రెస్ పార్టీ అనూహ్య పరిణామాల్లో ప్రధానమంత్రి గా శ్రీ.పి.వి.నరసింహారావు గారిని ప్రకటించినపుడు రాజకీయాలకు అతీతంగా ఒక తెలుగువ్యక్తి దేశ ప్రధాని అవుతున్నందుకు మనసారా అభినందించి,ఆయన పార్లమెంటు సభ్యులు కానందున మన రాష్ట్రములోని నంద్యాల లోక్ సభ స్థానానికి  జరిగిన ఉప ఎన్నికలో ఆయన్ని ఏకగ్రీవంగా ఎన్నుకోవాలని ఆకాంక్షించి, తెలుగుదేశం పార్టీ  తరపున పోటీ పెట్టమని ప్రకటించి,తన విజ్ఞతను చాటుకున్నారు.

తెలుగువారు ఎక్కడ ఉన్నా తమ ఔన్నత్యాన్ని పదిమందికి ఆదర్శంగా ఉండాలని చెప్పేవారు. 

రాష్ట్రంలో అధికారంలో లేకపోయినా ప్రజా సమస్యలపై పోరాడుతూ ప్రజలను కలుస్తూ ఉండేవారు.అన్నట్లు ఈ విరామ సమయంలో కొన్ని సినిమాలు కూడా చేసారు.ముఖ్యముగా 1993లో ఆయన చివరిసారిగా నటించిన "మేజర్ చంద్రకాంత్ " సినిమా సూపర్ హిట్ అయింది.

1994 లో ఆంధ్రప్రదేశ్ అసెంబ్లీ ఎన్నికల్లో హిస్టరీ రిపీట్ అయ్యింది. ఎన్ఠీఆర్ నాయకత్వం లోని

తెలుగుదేశం ,మిత్రపక్షాలతో కలిసి దాదాపు 250 స్థానాల్లో గెలిచి తిరుగులేని మెజారిటీ సాధించింది. కాంగ్రెస్ పార్టీ కేవలం 23 సీట్లుతో ప్రధాన ప్రతిపక్ష హోదా కూడా పొందలేక పోయింది.

ఎన్టీఆర్ మళ్లీ తనదైన బాణీలో సంపూర్ణ మద్యపాన నిషేధం,ప్రజల వద్దకు పాలన వంటి వినూత్న కార్యక్రమాలకు శ్రీకారం చుట్టారు.

1995 ఆగస్టులో జరిగిన పరిణామాలు,ఎన్ఠీఆర్ కుటుంబ సభ్యులు,కొన్నిఇతర శక్తులు కారణంగా ఎన్ఠీఆర్ ఆనుకోకుండా అధికారాన్ని కోల్పోవడం , ఆ తదుపరి కొద్దీ నెలల్లోనే 1996 జనవరి 18 న ఎన్ఠీఆర్   "మహా నిష్క్రమణ" జరిగింది.

ఇక్కడ అందుకు కారణాలు కానీ, ఆయన వ్యక్తిగత జీవితంలో అనుభవించిన మానసిక క్షోభ వంటి చేదు అంశాల లోతుల్లోకి వెళ్లదలుచుకోలేదు.

నేను ఎన్ఠీఆర్ వీరభిమానిని.

ఆయన ఒక గొప్ప సమ్మోహన శక్తి కలిగిన వెండితెర వెలుపుగా, అవతారపురుషుడు గానో,తెలుగుభాష,తెలుగు జాతి కోసం అహరహారం శ్రమించిన గొప్ప నాయకుడిగా, పేద ప్రజల సంక్షేమం కోసం నిరంతరం ఆలోచించే గొప్ప రాజ నీతిజ్ఞునిగా భావిస్తాను.

అవినీతికి తావులేని,స్వచ్ఛమైన పాలన అందించారు. అధికార దుర్వినియోగానికి పాల్పడలేదు.

 శ్రీ నందమూరి తారకరామారావు గారు భౌతికంగా మన నుంచి దూరమై దాదాపు 25 ఏళ్ళు గడిచినా ఇంకా కోట్లాదిమంది తెలుగు ప్రజల గుండెల్లో ఆయన సజీవంగా ఉన్నారు.అంతటి మహానుభావునికి "భారత రత్న"పురస్కారం రాకపోవటం శోచనీయం.కేంద్రంలో కీలక పదవుల్లో ఉన్న తెలుగు పెద్దలకు మరోసారి గట్టిగా తెలుగు ప్రజల ఆకాంక్షగా ముక్తకంఠంతో చెపుదాం.

అలాగే కనీసం ఆయన జన్మదినము మే,28 వ తేదీని "తెలుగు జాతి ఆత్మ గౌరవ దినోత్సవం"గా రాష్ట్ర ప్రభుత్వం ప్రకటించి,అధికారిక కార్యక్రమాలు రాష్ట్ర వ్యాప్తంగా జరపాలని  కోరుదాం.


ఈరోజు ఆ మహానుభావుని జన్మదిన సందర్భంగా అభిమానులు అందరి తరుపున మరియు నా వంతుగా హృదయ పూర్వక నమస్సుమాంజలు అర్పిస్తున్నాను!


SUBSCRIBE TO OUR NEWSLETTER

Seorang Blogger pemula yang sedang belajar

0 Response to "About Nandamuri Taraka Ramarao"

Post a Comment